My Best Friend's Wedding

ليس هناك هدف محدّد من هذه التدوينه .. هو فقط موقف كُلّما تذكّرته أبتسم برغم أنّه وقت وقوعه لم يكن باعثا على الابتسام فى حينه .. و أردت هنا أن أحتفظ به للذكرى علّه يظلّ يثير ابتسامى فى وقت قادم

****************

22 فبراير 2007

النهارده عيد ميلاد "نهى" صاحبتى "الأنتيخ" -على رأى اللمبى- فى الجامعه ..

من سنين طويله عزمتنى "نهى" لحضور حفل زفافها ؛ شئ بديهى و مش محتاج تعليق طالما إحنا أصحاب قريّبين .. لكن ما كان يحتاج لبحث و تمحيص أن الفرح سيقام فى الصعيد .. "نهى" من "سوهاج" و كانت مقيمه فى المدينه الجامعيه أيام الكليّه ..

وبعد مداولات و مشاورات تمّت الموافقه على السفر .. و حجزت تذكرتين رايح جاى فى قطار الصعيد و خرجت بعد ظهر أحد أيّام الخميس من الشغل إلى المحطه .. "نهى" رفضت رفضا باتّا تدّينى عنوانهم فى "سوهاج" .. عشان عاوزه تعمل معايا واجب و تبعت لى وفد من أقاربها يستنّونى و مايصحّش أبقى ضيفتها و آجى البيت لوحدى لازم حد يستقبلنى .. خصوصا و اخواتها البنات يعرفونى .. صاحبة واجب لكن .. ما علينا :)

وصلت "سوهاج" فى هذا اليوم حوالى الساعه 9 بالليل .. المحطّه صغيّره و شكلها كانت فى انتظار القطار الأخير هذا كى تغلق أبوابها !! مفيش دقايق بعد وصول القطار إلاّ و كانت قد أصبحت خاليه تقريبا وضلمه و ............ مفيش أى حد مستنّينى !!

فردت طولى و مشيت بكل إباء و شمم إلى خارج المحطّه .. ذهبت لمركز اتّصالات و طلبت رقم "نهى" -الكلام ده كان تقريبا عام 2001 و وقتها ماكانش المحمول فى يد الجميع كما هو الحال دلوقت- التليفون مشغووووووول .. قضيت حوالى ربع ساعه أتّصل و التليفون بردو مشغول .. و أخيرا رنننننننننننننن .. تنفّست الصعداء خصوصا و صاحب المركز بدأ يلاحظ توتّرى خاصة بعد ما خدت وقت طويل أتّصل و مش باكلّم حد !!

ترررن تررررن .... ترررن تررررن .. ترررن تررررن .. محدّش بيردّ !! دى ليلة إيه البيضا دى بس يا رب .. ما كان مشغول من شويه وبعدين الناس حَبَك يسيبوا البيت ليلة فرح بنتهم !! هيروحوا فين بس !!

خرجت من مركز الاتّصالات أستطلع الموقف .. شعرت وقتها يعنى إيه الواحد يكون فى الصعيد .. مش فى "الأقصر" "أو أسوان" مثلا يشوف له أوتيل يترزع فيه لحد ما النهار يطلع .. لا لا الوضع كان مختلف تماما و الناس كأنّها بتفقس مين الغريب من القريب .. و المشكله ان اللىّ على راسه بطحه بيحسس عليها و أنا واضح إن وشّى كان جايب ألوان أو يمكن ده كان شعور داخلى بس ولا حد واخد باله ..


رجعت المركز اتّصلت بأمىّ اللىّ سألتنى : ها قابلتى "نهى"؟ فلقيتنى باضحك و باقول لها ان مفيش أى حد مستنّينى ولا معايا عنوان و تليفون البيت عندهم مش بيرد و مش عارفه هاروح فين ولا هاتصرّف ازاى أصلا .. أكيد ماكانش مفروض أقول لها الحقيقه العاريه كده بكل بساطه بس الموقف فعلا كان مريع جدا وقتها و انا كنت عاوزه اتكلّم عن ورطتى دى مع اى حد ..

قفلت مع أمّى بعد ما رُكَبها سابت و بقت تضرب أخماس فى أسداس على بعد مئات الكيلومترات و رجعت أتّصل ب "نهى" .. نسيت أقول لكم أن خلاص صاحب مركز الاتصالات بقى متابع القصه و جاب لى عصير قصب و تعاطف جدّا مع قضيتى و اعتبرها قضيته شخصيا..

أخيرا ردّوا فى البيت و أنا تقريبا عيّطت أمّا سمعت صوت آدمى بيقول : آلو ..
يااااااااااه على رأى "سعيد صالح" فى "هاللو شلبى" أمّا كان منفعل أوى و بيقول : آل لى آلووو .. يمكن من أكتر المرّات اللىّ فرحت فيها بسماع الكلمه دى !!

المهم طلع إيه !! "نهى" نسيت إنّى جايه !! و نسيت تبعت لى حد المحطّه .. و كان التيفون بيرن و هُمّا مش سامعينه بسبب الموسيقى و الرقص و الاحتفالات فى البيت !!
وصفت لها مكانى بالظبط بمساعدة صاحب المركز و قالت انّها هتبعت لى حد يجيبنى ..

استنّيت ييجى ربع ساعه و محدّش بردو جه !! اتّصلت تانى لقيتها بتقول لى انّهم راحوا لى فعلا و مالقيوش حد رجعوا !! يادى النيله .. ده إيه البساطه دى :( الراجل المره دى خد سمّاعة التليفون و وصف لهم المكان و فييييييييييين .. بعد دقائق طويله و سخيفه جدا شفت وجه مألوف .. أخت "نهى" جت و تعرّفت علىّ مع الوفد المرافق .. و شكرت صاحب مركز الاتّصالات على ذوقه و كرمه و مشيت معاهم ..

بس ماخبّيش عليكم إن وقت ذهابى معهم و أمّا وصلت البيت عندهم كنت فعلا فى حاله فظيعه من الضيق و الحزن و لولا أن ماكانش ينفع كنت فعلا طلبت أرجع بيتنا و اكتفيت بهذا القدر من الرحله .. رغم ان دلوقت كل ما افتكر الحكايه دى أفضل أضحك .. خصوصا أمّا أفتكر الاستقبال الحافل الذى قوبلت به بعد العوده للقاهره على طريقة إبقى شوفى مين هيخلّيكى تسافرى فى أى حته بعد كده أصلا ..

كل سنه و انتى طيبه يا "نهى" ..