Sunday, April 13, 2008

هذه المخلوقات اللطيفه !!

كما ذكرت لكم فى السابق أتابع بشغف برنامج "مساءك سكّر زياده" على قناة "أو تى فى" و خاصة يوم الثلاثاء حيث فقرة الكتاب التى تستضيف كاتبا للحديث معه حول أحد كتبه

فى الأسابيع القليله الماضيه استضاف البرنامج الكاتب "بهاء طاهر" بمناسبة فوز روايته الأخيره "واحة الغروب" بجائزة "بوكر" العربيه .. ثمّ استضاف فى الأسبوع التالى الكاتب "جمال مقار" لمناقشة كتابه "كتاب الودعاء" الذى أصدرته مؤخّرا "دار الشروق"

لا أدرى لماذا لفت نظرى فى الضيفين روح لطيفه من التواضع الغير مفتعل كانت تغلّف الحوار .. صوت خفيض هادئ و ردود صريحه بدون فذلكه أو ادّعاء !! لدرجة أنّى برغم عدم تحمّسى السابق لقراءة الكتاب الثانى "الودعاء" فكّرت جديّا فى الاطّلاع عليه تمهيدا لقراءته لو أعجبنى .. استغربت كذلك شعورى خلال مشاهدة الكاتبين و سألت نفسى : هل صار التواضع الحقيقى قيمه نادره تجعلنا نشعر بسعاده و ألفه مع من يمارسونها كما تجعلنا نحب الاستماع لحديثهم و الاستمتاع برؤيتهم !! أحد الأسئله التى وجّهت ل "جمال مقار" كان حول العناوين الغريبه التى يختارها لكتبه و التى قد تجعل الإقبال على قراءتها محدودا بعض الشئ .. توقّعت إجابه تلقى اللوم على القارئ أو تتّهمه بالسطحيه أو رد من نوعية "أكتب لنوعيه خاصه من القرّاء" لكنّى فوجئت بالإجابه البسيطه :

أنا باعرض الكتب على الناشر ولم يحدث فى مرّه أن قوبلت العناوين التى أختارها بالاعتراض ..

هذكا من دون أى ادّعاء أو سفسطه وكلمات من نوعية "تماهى السرد" التى أنوى أن أكتب عنها تدوينه لاحقه :) إن شاء الله

"بهاء طاهر" كذلك بابتسامته البسيطه و صمته الذى يزيد عن كلامه كان حضوره مؤثّر للغايه و ربّما لبعد المسافه بين مشاهدتى للحلقه الخاصه به و بين كتابة هذه التدوينه لا أوفيه حقّه من الحديث لكن ربّما يكفى أن أقول أنّى سعدت كثيرا بمشاهدة هذين المخلوقين اللطيفين حتى لو لم تعى الذاكره كل ما تحدّثوا عنه ..

13 comments:

Anonymous said...

انا هتكلم عن بهاء طاهر لان هو الي اعرفه وقرات له قبل كده ... طبعا قريت له واحة الغروب وهي فعلا جميلة جدا وتستاهل بس انا معجب جدا ب "بالامس حلمت بك " احساس عالي وتشعري بانك مع البطل في غربته ومحنته وماساته واستغربت جدا اول مرة شفته في امسية ثقافية طلع اكبر كتير في السن عن ما كنت متخيله وفعلا هادي جدا وقليل الكلام وساعات كتير بتكون اجاباته ضحكة او حركة او هزة راس مش اكتر
فعلا انسان جميل ووقور .....والحمدلله ان لسه موجود شخصيات نحب نسمع لها او نقراء لها وتكون بهذه البساطة والتواضع

m.sobhy1990@gmail.com said...

مساء الخير عليك

إنت كده هتخلينى أقرا الكتاب ده

وبالنسبة للتواضع فأنا شايف إن عملة نادرة ف كل العصور

تحياتى ليك

عباس العبد said...

تماهى السرد
هههههههههه
جامدة موت
ربنا رزقنا بشوية كتاب من بتوع تماهى السرد دول ... ربنا يعوض علينا
----
حقولك على حاجة
أشترى رواية أسمها " فاصل للدهشة " و أقريها كويس و أحتفظى برأيك مهما كان ... خلاص ماشى
ماشى
أكتبى فى جوجل أسم الرواية و أقرى النقد الى مكتوب عن الرواية و أستمتعى بجواب جواب السيكا
قصدى بردم الردم بتاع تماهى السرد
ربنا يعوض علينا نافوخنا
--------
السيد بهاء طاهر أنا أتشرفت بمقابلته و حضرت له كلمة فى أحدى دور النشر
تواضع من النوع النادر
شخصية محترمة جداً
الودعاء بتاعة جمال مقار جميلة و عاملة زى كتابات مستجاب و خاصة أنه الرابع من ال-مستجاب
رواية حلوة

عدى النهار said...

الزيف والإفتعال هما الغالبين على سلوكيات كثيرة ، وزى ما فى ناس بتفتعل التواضع ممكن تجدى من يفتعل لنفسه قيمة أكبر من حقيقته ويبقى منفوخ على مافيش.. وهكذا فى صفات كثيرة. أعتقد إن ده هو السبب وراء إحساسنا الزائد بالإرتياح والسعادة عندما نتعامل مع ناس بتتصرف بدون إفتعال

بالنسبة للبرنامج.. مش معقول يكون إسمه "مساءك سكّر زياده" ويجيب ضيوف أقل من كده
:)

بنت القمر said...

زمزم
:))))بضحك علي تماهي السرد
وبعدين افتكرت عباس العبد فجأه وقولت لو قري البوست ده ها يقول ما بداله علي تماهي السرد
:))))
اصل كان ليه اشتباك مع بتوع تماهي السرد في مدونته
:)))) طبعا انا شمتانه فيه جدا
عشان لسته الادباء اللي حاطتهم علي جنب معظمهم من بتوع تماهي السرد وردم الردم
وريحه الشراب
ونقيق الضفدع في المنور وشق الكنبه المهترئ
:)))
قوم عداله السماء يا ستي انه يشتبك معاهم
قوم ادخل اعلق الاقيه لسه فاكر تعيش وتفتكر يا اديب
عموما يا زمزم يا حبيبتي
انا حطيت ليسته مبدئيه
لادباء واعدين علي جنب عندي هديه لقرائي الاعزاء
ارشح لك اسامه ياسين
تابعيه واقري القديم بتاعه واعتقد انه ها يعجبك اوي
وملوش في تماهي السرد
:)))))
تحياتي

DantY ElMasrY said...

التواضع لما يكون من القلب بيدى للشخصية جاذبية خاصة وتخلينا نحس انه بتواضعه اكبر مننا
الإنسان بيتحاسب على ما يدعيه!
واخده بالك

زمان الوصل said...

أهلا بكم :)

===
حسين
===

للأسف بدأت من فتره طويله فى قراءة "واحة الغروب" ثمّ توقّفت و سأضطرّ للبدء من جديد .. قرأت "بالأمس حلمت بك" و حسّيت باكتئاب :( أنا -للأسف- مش باحب الحاجات اللىّ تكئب "
وش محرج" :)


========
محمد صبحى
========

مساء النور عليك :) اقرا الكتاب و يا رب يعجبك


==========
عبّاس العبد
==========

بجد الموضوع محتاج تدوينه مستقلّه .. أنا حاليا فى مرحلة جمع المادّه :) بس "تماهى" دى انتشرت بطريقه مفزعه فعلا !!

بخصوص "فاصل للدهشه" .. فيه واحد ربنا يكرمه حاطط فصل منها على النت .. فهمت منه ليه انت قلت "احتفظى برأيك مهما كان" :) بس الاطرف من الروايه مقال نقدى عنها قراته فى احد المنتديات لواحد اسمه "يسرى" باين .. من كتر مانا مافهمتش حاجه افتكرته بيهرّج بس لقيت ناس بتعلّق بجديّه و معجبه بالكلام !! قلت لأه بقى دى محتاجه تدوينه بجد يا ولاد الذينه ..

الفكره إن البساطه و الوصول لمعنى عميق من خلال مفردات بسيطه هو اللىّ يبيّن الموهبه و الحرفه الحقيقيه مش مصطلحات من نوعية "تماهى السرد" و ما بعد الحداقه -الحداثه سابقا- و البنيويه العظمى و التفكيكيه الصغرى !!

أنا طبعا لا أنكر إطلاقا أن هناك مصطلحات قد تحتاج منّى بحث و اطّلاع عليها دون اتّهام من يستخدمونها بالتفذلك بس فعلا الموضوع بقى كأنّه رهان مين يلعبك كلامه أكتر عشان الناس ماتفهمش مع إن المفروض إن الهدف هو العكس تماما !!

زمان الوصل said...

====
مدحت
====

كل ما ذكرته صحيحا خاصة أسباب ارتياحنا الزائد حين نجد من يتصرّف بدون افتعال .. أنا فعلا استغربت احساسى بالسعاده بهؤلاء كما استغربت أصلا سعادتى بتواضعهم بس أنا فعلا اتفاجئت بيهم .. الشخصيات العامّه فى ظروف كتير بتتصرّف بتعالى غير مبرّر بيخلّى التواضع الحقيقى مفاجأه سارّه :)

بخصوص البرنامج .. مش كل اللىّ بييجوا فيه بيبقوا على نفس المستوى من الحلاوه :) واضح إنّهم بيوفّروا السكّر لناس و ناس


==========
بنت القمر
==========

تعرفى ان الكلمه دى تحديدا كنت بافكّر احذفها و اؤجل الحديث عنها تماما لحين كتابة تدوينه مستقلّه :) أنا بقيت أدوّر عليها فى كل ما أقرأ ولا المصابين بالوسواس القهرى !!

هابص على ليستتك فورا .. أنا فعلا باحب جدّا فكرة التشارك فى عرض ما قرأناه و عجبنا بدل التوهه اللىّ احنا فيها دى


====
دانتى
====

فعلا انا كنت باتأمّل الاثنين خلال حديثهم و طريقة كلامهم و نظراتهم باهتمام شديد .. لدرجة أنّى تصوّرت إن يبقى جميل لو صوّرتهم فيديو خلال حديثهم .. فيهم حاجه تشد .. زى جملتك بتاعة "الإنسان بيتحاسب على ما يدّعيه" :)

بنت القمر said...

طب بما انك ناويه تعملي تدوينه مستقله بعد ما تبصي علي اسامه ياسين ضروري جدا قديمه وجديده
ابقي بصي علي ما كتبته سابقا
http://bntalkamar.blogspot.com/2008/03/blog-post_25.html

قلم جاف said...

في ظل وجود "إقبال بركة" و "مرتضى منصور" و فرقة "أعلى مستوى" و "مصر مستهدفة" لموشحات المجاذيب من الصعب أن تجدي شخصية عامة تتسم بالحد الأدنى من التواضع.. عثورك في شخصية عامة متواضعة لا تصيبها أقل كمية شهرة بلوثة عقلية هو كنز بكل ما تحمله الكلمة من معنى..

ودة شيء حلو علشان الأجيال الجديدة تشوف شيء طبيعي وصح ..

Anonymous said...

تماهي السرد بيعكس تماهي المؤلف مع النص وتماهي القارئ مع دار النشر

:)

زمان الوصل said...

==========
بنت القمر
==========

قرأت تدوينتك السابقه و اتّفقت مع مضمونها .. أعترف أنّى دقّه قديمه فيما يتعلّق بالأدب و الفن :) الحمد لله أنّها أمور متروكه لتذوّقنا الشخصى و مالهاش قواعد نمشى عليها ..


=======
قلم جاف
=======

"إقبال بركه" .. حرام عليك :) طيب ليه بس السيره دى .. ياللا حصل خير إن شاء الله


===============
مختار العزيزى :)
===============

بس أنا لم أقرأ "تماهى" و "سرد" فى جمله واحده مع بعض :) الحقيقه كلمة "تماهى" لوحدها بتتكرّر كتير و كلمة "سرد" طبعا .. وانا باكتب التدوينه لقيتنى بارزعهم جنب بعض و شكلهم بقى شبه الحاجات اللى باقراها و تغيظنى دى قلت خلّيها كده تيجى مع الهبل دوبل :)

سابرينا said...

هل صار التواضع الحقيقى قيمه نادره تجعلنا نشعر بسعاده و ألفه مع من يمارسونها كما تجعلنا نحب الاستماع لحديثهم و الاستمتاع برؤيتهم !
التواضع فقط؟
كل القيم الخيرة...........بقت كدة
نشعر بسعادةودهشه محببه انها لازالت موجودة!